ठिकठिकाणी पाणी साचल्याने माजी विरोधी पक्षनेते नाना काटे यांच्याकडून मदतीसाठी धाव
पिंपरी, ता. २५ : मागील २४ तासांपासून पिंपरी चिंचवड शहरामध्ये चालू असलेल्या मुसळधार पावसामुळे चिंचवड विधानसभा क्षेत्रामध्ये विविध ठिकाणी पाणी साचल्याने जनजीवन विस्कळीत झाले. काही ठिकाणी झाडे उन्मळून पडल्याने वाहतुकीस अडथळा निर्माण झाला. याची माहिती मिळताच माजी विरोधी पक्षनेते नाना काटे यांनी थेट घटनास्थळी जाऊन पाहणी केली.
चिंचवड विधानसभा मतदारसंघात सकाळपासून घटनास्थळी स्वतः उपस्थित राहत नाना काटे यांनी संपूर्ण चिंचवड मतदारसंघातील पावसाचा आढावा घेतला. पिंपरी चिंचवड महानगरपालिकेचे कर्मचारी , अग्निशामकचे कर्मचारी यांना पाचारण करून उन्मळून पडलेली झाडे बाजूला काढणे, तुंबलेले पाण्यांना वाट काढून देणे तसेच पाण्याचा योग्य निचरा करण्याच्या सुचना संबंधितांना दिल्या.
तसेच पुढील काही तासात पावसाचा जोर कमी नाही झाला तर विधानसभा क्षेत्रातील वाकड व नदीकाठच्या गावाची अवस्था बिघडू शकते याची पूर्वकल्पना महाराष्ट्र राज्याचे उपमुख्यमंत्री तसेच पुणे जिल्ह्याचे पालकमंत्री अजित पवार यांना फोन द्वारे कळवून त्यासाठी आवश्यक यंत्रणा पुरवण्यात याव्यात, अशी विनंती केली आहे.
----------
