स्वीप उपक्रमांतर्गत युवक युवतींचा मतदानाचा निर्धार
पिंपरी, ता. १८ : '' येत्या विधानसभा निवडणुकांमध्ये युवकांनी स्वत: मतदान करावे तसेच आपले कुटुंब, मित्रपरिवार यांमध्ये मतदानाविषयी जनजागृती करून त्यांना मतदानासाठी प्रोत्साहित करावे. लोकशाहीच्या उत्सवामध्ये सहभागी होऊन तरुणाईने आपले राष्ट्रीय कर्तव्य पूर्ण करावे'', असे आवाहन उपायुक्त तथा स्वीपचे नोडल अधिकारी अण्णा बोदडे यांनी गुरुवारी (ता. १७) केले.
युथ आयकॉन २०२४ स्पर्धेच्या बक्षीस वितरण समारंभामध्ये बोलत होते. युवक-युवतींमधील कलागुणांना व्यासपीठ मिळवून देण्यासाठी स्वीप उपक्रम राबविण्यात येत आहे. त्या अंतर्गत पिंपरी चिंचवड महानगरपालिका, पिंपरी चिंचवड स्मार्ट सिटी लि., एल्प्रो सिटी स्क्वेअर मॉल आणि रिलायन्स स्मार्ट बझार यांच्या वतीने युथ आयकॉन २०२४ स्पर्धेचे आयोजन करण्यात आले होते. युथ आयकॉन स्पर्धेमध्ये ४५० पेक्षा जास्त स्पर्धकांनी सहभाग घेतला असून त्यांना २० हजारांपेक्षा जास्त नागरिकांनी ऑनलाईन सहभाग घेतला आहे. ही स्पर्धा पीसीएमसी स्मार्ट सारथी सिटीझन एंगेजमेंट उपक्रमाच्या अंतर्गत आयोजित करण्यात आली आहे.
यावेळी पिंपरी चिंचवड महानगरपालिकेचे उपायुक्त अण्णा बोदडे,जनता संपर्क अधिकारी प्रफुल्ल पुराणिक, एल्प्रो सिटी इंटरनॅशनल लि.चे अध्यक्ष आणि व्यवस्थापकीय संचालक दीपक कुमार, एल्प्रो सिटी स्वेअरचे केंद्र संचालक निशांत कन्सल, रिलायन्स स्मार्ट बाजारचे मनोज भडके उपस्थित होते. विशाखा शेरे, मनीष मिश्रा, प्रियांका बायांना यांनी स्पर्धेचे परीक्षक म्हणून काम पाहिले. या कार्यक्रमासाठी नामांकित कलाकार उपस्थित होते. छत्रपती संभाजी महाराज चित्रपटामधील कलाकार स्वराज भोईटे, शीतल पाटील हे यावेळी उपस्थित होते. तसेच पियुष सजगने, ज्योती सेतसंधी, अक्षय पंडागळे यांनी देखील कार्यक्रमामध्ये आपली उपस्थिती नोंदवली.
---
