पवना नदी पुनरुज्जीवन प्रकल्पास पर्यावरणाचा ना हरकत दाखला
पिंपरी, ता. ८ : पिंपरी चिंचवड महानगरपालिकेने पवना नदीचे पुनरुज्जीवन करण्यासाठी महत्वाकांक्षी प्रकल्पाचे नियोजन केले आहे. शहराच्या मध्यवर्ती भागातून पवना नदी वाहत असून तिची लांबी २४.४० किलोमीटर आहे. त्यानुषंगाने पिंपरी चिंचवड महानगरपालिकेमार्फत अनुभवी तांत्रिक सल्लागार मे.एच.सी.पी. डिझाईन अन्ड मॅनेजमेंट प्रा.लि. यांची नेमणूक करण्यात आलेली आहे. या सल्लागाराने संपूर्ण पवना नदीची पाहणी करून नदीच्या पाण्याचे प्रदूषण कमी करणेसाठी व पूर नियंत्रण विषयक काम करणेसाठी विस्तृत प्रकल्प अहवाल तयार केलेला आहे. पवना नदीचे पुनरुज्जीवन प्रकल्पाचा हायड्रोलॉजी व हायड्रोलिक्स अहवाल भारत सरकारच्या Central Water and Power Research Station, Pune (CWPRS) मार्फत तयार करणेत आला आहे.
पिंपरी चिंचवड महानगरपालिकेमार्फत पवना नदी पुनरुज्जीवन प्रकल्पाकरिता पर्यावरण ना हरकत दाखला मिळणेसाठी महाराष्ट्र सरकारला १०/१२/२०१९ रोजी अर्ज करणेत आला होता. राज्य सरकारच्या मा. State Expert Appraisal Committee 3 (SEAC-3) समितीमार्फत दि. ०८/०८/२०२३ रोजी मंजुरी प्राप्त झाली आहे. तदनंतर सदर अर्जावर महाराष्ट्र शासनाच्या मा. The State Environment Impact Assessment Authority (SEIAA) समिती मार्फत वेळोवेळी बैठक घेण्यात आली होती. मा.SEIAA समितीमार्फत दि.१५/०५/२०२५ रोजी बैठक आयोजित केली होती. मा. आयुक्त, पिंपरी चिंचवड महानगरपालिका यांनी वेळोवेळी झालेल्या बैठकीमध्ये प्रकल्पाबाबचे माहितीचे सादरीकरण केले होते. दि.०७/०७/२०२५ रोजी मा. SEIAA समितीच्या बैठकीचा सभावृतांत प्रसिद्ध झाला असून त्यामध्ये पिंपरी चिंचवड महानगरपालिकेच्या पवना नदीचे पुनरुज्जीवन प्रकल्पास ' पर्यावरण ना हरकत दाखला ' देण्यात आला आहे.
या प्रकल्पाकरिता राज्य व केंद्र शासनाकडून निधी प्राप्त झालेनंतर निविदा कार्यवाही करून नदी पुनरुज्जीवन प्रकल्पाचे काम करणेत येणार आहे. सदर पवना नदी पुनरुज्जीवन प्रकल्प नदी काठाचे संरक्षणासाठी, नदीकाठाची होणारी झीज टाळणेसाठी, जैव विविधता वाढीसाठी, पक्षांची घरटी, निवासस्थाने निर्माण करणेसाठी ठिकाणे, जवळचे जलाशय व नदीमध्ये जलचराचे वाढीसाठी, एकंदरीत नैसर्गिक नदीचे पुनरुज्जीवनासाठी उपयोगी ठरणार आहे.
संजय कुलकर्णी मुख्य अभियंता (१) पर्यावरण अभियांत्रिकी विभाग
------------
